1 наурыздан бастап еліміздің 8 өңірінде ауыр жүк көліктерінің қозғалысына уақытша шектеу қойылады

Қазақстанда 1 наурыздан бастап ауыр жүк таситын жүк көліктері қозғалысына еліміздің бірқатар өңірінде шектеу қойылады. Көктемгі кезеңге арналған бұл шектеу 1 сәуірге дейін созылады, деп хабарлайды "ҚазАвтожол".

"ҚазАвтоЖол" ҰК" АҚ 2025 жылғы көктемгі кезеңде уақытша жүрісті шектеудің жыл сайынғы қолданылу мерзімдеріне сәйкес жеке білікке түсетін жүктемесі 8 тоннадан артық автокөлік құралдарының жүрісіне шектеу енгізілетінін хабарлады.

"Индустрия және инфрақұрылымдық даму министрінің 2023 жылғы 5 шілдедегі №492 бұйрығының 19 тармағына сәйкес, республикалық автожолдарды қысқы мезгілден кейін сақтау мақсатында 2025 жылғы 1 наурыздан бастап 1 сәуірге дейін "бесінші жол климаттық аймаққа" жататын келесі сегіз облыста шектеу енгізіледі:

• Алматы облысы

• Атырау облысы

• Жамбыл облысы

• Ұлытау облысы

• Қызылорда облысы

• Маңғыстау облысы

• Жетісу облысы

• Түркістан облысы

Алайда келесі автокөліктердің түрлеріне бұл шектеулер қолданылмайды:

• халықаралық жүк және жолаушылар тасымалына;

• төтенше жағдайлар мен олардың салдарын алдын алу және оларды жою жөніндегі іс-шараларды жүзеге асыратын көліктерге;

• гуманитарлық көмек көрсететін, азық-түліктерді, дәрі-дәрмектерді, жолаушылар мен багаж тасымалын жүзеге асыратын көліктерге;

• жол-құрылыс жұмыстарына пайдаланылатын көліктерге.

Жүргізушілер мен көлік иелеріне осы ақпаратты маршруттарыңызды жоспарлағанда ескерулеріңізді сұраймыз", - делінген хабарламада.

Мәтіннен қате тапсаңыз, бізге жазыңыз