Нөсер, найзағай, қатты жел: құтқарушылар Алматы тұрғындарына үндеу жасады

Алматы қаласының Төтенше жағдайлар департаменті өкілдері дауылды ескертуге байланысты қала тұрғындары мен қонақтарына үндеу жасады, деп хабарлайды KAZ.NUR.KZ ведомствоның баспасөз қызметіне сілтеме жасап.

Құтқарушылар 5 сәуірде күндіз Алматыда қатты жаңбыр жауып, найзағай күтілетінін, сондай ақ найзағай кезінде шығыстан жел соғып, оның екпіні секундына 15- 20 метрге дейін жететінін ескертті.

"Қатты жауын-шашын (қар, жаңбыр) немесе қатты жел туралы дауылды ескерту жарияланса, таулы аймаққа баруды кейінге қалдырған дұрыс", - делінген ТЖД хабарламасында.

Құтқарушылар нөсер туралы ескертуге байланысты қала тұрғындарынан жол қозғалысы кезінде абай болып, Іле-Алатау тауларына бармауды сұрады.

Сонымен қатар олар жеке үй иелерінен жаңбыр суы ағатын дренаждық жүйелерді тазалап, дайындық шараларын қабылдау керек екенін айтты.

"Егер көшеде келе жатқанда, жаңбыр жауса электр желілерінің тұтастығына назар аударыңыз; көліктерді ағаш астында қалдырмаңыз. Әлсіз құрылымдардың астында тұрмаңыз: олар құлап, сізді жарақаттауы мүмкін. Жаяу жүргіншілер де абай болуы керек - жаңбыр кезінде жүргізушілер сізді көрмей қалатынын еске сақтаңыз", - деп ескертті құтқарушылар қала тұрғындары мен қонақтарын.

Мәтіннен қате тапсаңыз, бізге жазыңыз