Алматыдағы дауыл салдары: үйлердің шатыры ұшып, ағаштар құлады (видео)

Алматы тұрғындары әлеуметтік желіде қаладағы қатты дауылдың салдарын көрсетіп, видеоларды жарыса жариялап жатыр. Мәселен тұрғын үйлердің шатыры ұшып, қарт адамның үстіне метал конструкция құлаған, деп жазады KAZ.NUR.KZ.

Желіде жарияланған видеолардың бірі Таугүл шағын ауданында түсірілген. Кей деректер бойынша төтенше жағдай №53 үйде болған. Кадрлардан қатты жел көппәтерлі бесқабатты үйдің шатыры ұшырып әкеткенін көруге болады.

Одан бөлек Жетісу-4 ықшамауданында да үйдің шатыры ұшып кеткені туралы видеолар жарияланып жатыр. Мәселен "Твой Алматы" Telegram-арнасында көпқабатты үй шатырсыз қалғанын көруге болады.

"Қарсы беттегі үйдің шатырын жел ұшырып әкетті. Ол әне бір ғимараттың үстінде жатыр. Осындай жағдайлар болып жатыр бізде", - дейді кадр сыртындағы дауыс.

Одан бөлек қарт адамның үстіне желден металл конструкция құлаған. Оқиға видеосын куәгерлер жария етті. Видеода зардап шеккен қарт кісіге көшедегі жүргіншілер көмекке келгені бейнеленген.

"Мына бір зат ұшып барып, атаның үстіне құлады. Ол байғұс құлап түсті", - дейді видео авторы.

NUR.KZ тілшісі ер адамның жағдайын білу үшін Алматы қоғамдық денсаулық сақтау басқармасына және қала ТЖД-ға сұрау салды.

Мәтіннен қате тапсаңыз, бізге жазыңыз