Черногорияда ұсталған "НеМолчиKZ" қорының жетекшісі қамаудан босатылды

Желіде "НеМолчиKZ" қорының жетекшісі Дина Таңсәрі (Динара Смайылова) Черногорияда ұсталып, уақытша ұстау изоляторына қамалды және ол Қазақстанға экстрадициялануы мүмкін деген ақпарат тараған. Бүгін Черногория соты Дина Таңсәріні қамаудан босатқаны белгілі болды, деп хабарлайды KAZ.NUR.KZ.

Кеше, 14 сәуірде "НеМолчиKZ" қорының жетекшісі ұсталып, Подгорицадағы Жоғарғы сотқа жеткізілген.

Бүгін Черногорияның Жоғарғы соты Смаилованы босату туралы шешім қабылдады. Оны еліне қайтармайтыны туралы ақпаратты қор өкілдері хабарлады.

"Динаны босатты. Черногорияның Жоғарғы соты Динаны экстрадициялаудан бас тартты. Енді Динаның өзі сіздермен байланысқа шығады", - деп жазылған қордың Instagram парақшасындағы жазбада.

Еске салсақ, 2023 жылдың желтоқсанында қордың негізін қалаушы Дина Таңсәріге іздеу жарияланғаны белгілі болды. Бұл ақпарат Қазақстан Республикасы Бас прокуратурасының құқықтық статистика және арнайы есепке алу органдары порталында жарияланды.

Осыдан кейін Ішкі істер министрлігі өкілдері Дина Таңсәріге "көрінеу жалған ақпарат тарату, жеке өмірге қол сұқпаушылықты бұзуға" қатысты алты қылмыстық іс қозғалып, тергеп-тексеріліп жатқанын, оның ішінде екі алаяқтық фактісі бар екені туралы хабарлады.