Алматыдағы көшелердің бірінде қозғалыс 10 маусымға дейін ішінара шектеледі

Алматының Бостандық ауданында 40 жылдан астам уақыт бұрын пайдалануға берілген құбыр жаңартылады. Осыған байланысты 23 сәуір мен 10 маусым аралығында Бұқар жырау бульварында қозғалыс ішінара шектеледі, деп хабарлайды қалалық әкімдікке сілтеме жасаған KAZ.NUR.KZ.

"Алматының Бұқар жырау бульварында 1983 жылы пайдалануға берілген құбыр жаңартылады. Жалпы ұзындығы 1,3 шақырым болатын жылу трассасы 200-ден астам қалалық нысанды жылумен қамтамасыз етеді. Жазғы кезеңде аталған тұтынушылар үшін ыстық сумен жабдықтау сақталады.

Жоспарлы жұмыстарды жүргізу қауіпсіздігін қамтамасыз ету үшін 2025 жылғы 23 сәуір мен 10 маусым аралығында Бұқар жырау бульвары бойынша Сергей Марков көшесінен Римский-Корсаков көшесіне дейін оңтүстік жағынан автокөлік қозғалысы ішінара жабылады

Уақытша қолайсыздықтарға түсіністікпен қарауды және аталған учаскені айналып өту үшін алдын ала балама маршруттарды қарастыруды сұраймыз" , - делінген әкімдік хабарламасында.

Жалпы, биыл қала бойынша 35 км жылу желілерін жаңарту жоспарланған. Бұл тозу деңгейін 54 пайызға дейін төмендетпек.