Қазақстандық оқушы Азия-Тынық мұхиты аймағының ең мықты лингвисі атанды

Маңғыстау облысындағы IT-лицейдің оқушысы Рамазан Бутантаев Азия-Тынық мұхиты лингвистикалық олимпиадасында жоғары нәтиже көрсетіп, абсолютті жеңімпаз атанды, деп хабарлайды KAZ.NUR.KZ Оқу-ағарту министрлігінің баспасөз қызметіне сілтеме жасап.

Министрліктің мәліметінше, Азия-Тынық мұхиты лингвистикалық олимпиадасына (APLO-2025) Қытай, Австралия, Гонконг, Жапония, Малайзия, Иран, Корея, Сингапур, Таиланд сияқты елдерден биыл 500-ге жуық оқушы қатысты.

"Байқау қорытындысы бойынша Маңғыстау облысындағы IT-лицейдің оқушысы Рамазан Бутантаев жоғары нәтиже көрсетіп, олимпиаданың абсолютті жеңімпазы атанды. Ол аймақтың ең мықты қатысушыларын басып озып, алтын медаль иеленді", - делінген ведомство хабарламасында.

Жалпы Қазақстан құрамасы лингвистикалық олимпиада тарихындағы ең үздік нәтижені көрсетті — 5 медаль және 3 Құрмет грамотасын жеңіп алды:

Бірінші орын – Рамазан Бутантаев — 10 сынып, мамандандырылған IT-лицей, Маңғыстау облысы;

Екінші орын – Самир Сарбасов — 12 сынып, НЗМ, Астана қаласы;

Үшінші орын – Тимур Кантаев — 11 сынып, «Арыстан» мамандандырылған мектебі, Алматы қаласы;

Үшінші орын – Зере Серікова — 11 сынып, №9 «Зерде» мектебі, Астана қаласы;

Үшінші орын – Темірлан Сейтбаттал — 11 сынып, БИЛ, Ақмола облысы.

Құрмет грамотасымен марапатталғандар:

Ислам Сипатталов — 10 сынып, БИЛ, Ақтөбе қаласы;

Шыңғыс Қарасаев — 11 сынып, НЗМ, Орал қаласы;

Арон Хасанов — 11 сынып, БИЛ, Атырау қаласы.

Лингвистикадан Қазақстан құрама командасының жаттықтырушысы — лингвистика және география пәндерінен халықаралық және республикалық олимпиадалар жеңімпазы, Эберхард және Карл атындағы Тюбинген университетінің 2-курс студенті — Аида Давлетова.

Оқу-ағарту министрлігі жоғары нәтиже көрсеткен оқушыларды құттықтады.

Айта кетейік, Asia Pacific Linguistics Olympiad (APLO) — жоғары сынып оқушыларына арналған халықаралық лингвистикалық олимпиада. Бұл олимпиада логикалық ойлау, тілдік түйсігі мен мәдениетаралық құзыретті дамытуға бағытталған және Халықаралық лингвистикалық олимпиадаға (IOL) қатысуға жол ашады. APLO — оқушыларға халықаралық деңгейде өздерін сынап көруге және академиялық ортада таныла түсуге үлкен мүмкіндік береді.

Мәтіннен қате тапсаңыз, бізге жазыңыз