Астана аспанында белгісіз нысандардың пайда болуы: Қорғаныс министрлігі мәлімдеме жасады (видео)

Қорғаныс министрлігі Астана, Шымкент, Қарағанды және Қазақстанның басқа да қала тұрғындары байқаған аспандағы жарық нысандар туралы пікір білдірді, деп хабарлайды KAZ.NUR.KZ.

"Аспанда белгісіз нысандардың пайда болуына қатысты ақпараттың таралуына байланысты төмендегіні хабарлаймыз:

Қазақстан Республикасы аумағында әуе кеңістігінің бұзылу фактілері тіркелген жоқ. Жағдай тиісті қызметтердің толық бақылауында. Халыққа ешқандай қауіп төніп тұрған жоқ.

Аталған құбылыс атмосфераға еніп жатқан ғарыштық аппараттардың қалдықтарына немесе метеор ағынына ұқсайды. Мұндай нысандар, әдетте, атмосфераның тығыз қабаттарында жанып кетіп, жерге жетпейді.

Азаматтардан сабыр сақтауды және расталмаған ақпарат таратпауды сұраймыз. Құзырлы органдар бұл құбылысты зерттеп жатыр және қажет болған жағдайда ресми түсініктеме береді", - делінген Қорғаныс министрлігі таратқан хабарламада.

Бұған дейін Қазақстанның Цифрлық даму, инновациялар және аэроғарыш өнеркәсібі министрлігі де түсініктеме беруге уәде еткен еді.

Еске салайық, бүгін тұрғындар Астана аспанында пайда болған жарқыраған нысандар туралы әлеуметтік желілерде жарыса жазған. Халық бұл нысандарды құлап келе жатқан метеориттер немесе дрон сынықтары деп болжады. Кейін желі қолданушылары мұндай нысандарды Шымкент, Қарағанды, Теміртау және басқа да қалалардың тұрғындары да байқағаны айта бастады.

Айта кетейік, дәл осындай құбылыс өткен жылдың маусым айында Алматы, Талғар және Қонаев қаласында да байқалған.