Алматыдағы тағы бір тұрғын үй кешені бұзылып жатыр (фото)

Сот шешімімен Алматыдағы "Теректі" шағынауданындағы Orda City тұрғын үй кешені бұзылып жатыр, деп хабарлайды қала әкімдігіне сілтеме жасаған KAZ.NUR.KZ.

Әкімдіктің баспасөз қызметінің мәліметінше, қала басшысы Дархан Сатыбалдының тапсырмасы бойынша қаладағы заңсыз құрылысқа бақылау күшейтілуде.

Бүгін Қалалық құрылыс бақылау басқармасы "Теректі" шағынауданы Айналма көшесі, 183-учаскеде орналасқан заңсыз нысанды бұзу басталғанын хабарлаған.

Бұған дейін бұл тұрғын үй кешені БАҚ-та пәтер сатып алуға ұсынылмайтын тұрғын үйлер тізімінде көрсетілген.

Анықталғандай, құрылыс салушы – Investment Stroy ЖШС аталған тұрғын үй кешенін рұқсатсыз салған. Бұл факт жоспардан тыс тексеру барысында анықталған.

Меншік иесіне қатысты әкімшілік шаралар қабылданып, кейін Алматы қаласының Мамандандырылған ауданаралық экономикалық сотына (СМЭС) нысанды бұзу және шұңқырды қайта көміп тастау жөнінде талап арыз берілген.

"2023 жылғы 12 шілдеде сот Құрылыс бақылау басқармасының талаптарын қанағаттандырды. Апелляциялық шағым қаралғаннан кейін Алматы қалалық соты СМЭС шешімін өзгеріссіз қалдырды. Іс материалдары орындау үшін Әділет департаментіне жіберілді.

Нысанды бұзу жұмыстары кеше сот орындаушыларының қатысуымен басталды.

Қалалық құрылыс бақылау басқармасы азаматтарға жылжымайтын мүлік сатып алмас бұрын тұрғын үй кешеніне қатысты барлық құжаттардың болуын міндетті түрде тексеруді ұсынады", - делінген хабарламада.