Ішкі істер министрі Сәденов Кәрім Мәсімовтің денсаулық жағдайына қатысты сұраққа жауап берді

Опубликовано:18 маусым 2025, 14:59

Мәжіліс кулуарында Ішкі істер министрі Ержан Сәденов жазасын өтеп жатқан ҰҚК-нің бұрынғы төрағасы Кәрім Мәсімовтің денсаулық жағдайына қатысты сұраққа жауап берді, деп хабарлайды KAZ.NUR.KZ.

Министрдің айтуынша, Мәсімовтің жағдайы қалыпты, медициналық есепте тұрмайды.

"Ресми түрде айтамын жағдайы қалыпты. Ол бас бостандығынан айыру мекемесінде отыр", - деді Ержан Сәденов.

Естеріңізге сала кетейік, 2024 жылғы сәуірде Кәрім Мәсімов пен оның бұрынғы орынбасаларына сот үкімі шықты. Мәсімов Қылмыстық кодекстің бірнеше бабы бойынша кінәлі деп танылып, 18 жылға бас бостандығынан айырылды.

Кейін Мәсімовтің президенттен рақымшылық жасауын сұрағыны белгілі болды.

Алайда президент Кешірім жасау мәселелері жөніндегі комиссияның ұсынысымен келісіп, рақымшылық жасаудан бас тартты.

Мәтіннен қате тапсаңыз, бізге жазыңыз