Екібастұз энергия торабындағы апат салдарынан тұрғындар жарықсыз қалды

Екібастұз энергия торабында электр жеткізу желісі апаттық жағдайда ажырап қалды, оған ауа райының қолайсыздығы себеп болды деп хабарлайды, "Kegoc" АҚ-ға сілтеме жасаған KAZ.NUR.KZ.

"2025 жылғы 19 маусым сағат 16:44-те ауа райының қолайсыздығына байланысты Екібастұз энергия торабында 500 кВ электр жеткізу желісі апаттық жағдайда ажыратылды.

Апатқа қарсы автоматиканың іске қосылуы салдарынан шамамен 800 мегаватт көлемінде электр қуатына шектеу енгізілді.

Қазіргі уақытта мамандар 500 кВ желісін қайта қосу және энергия жүйесін қалпына келтіру жұмыстарын жүргізіп жатыр. Желіні толық қалпына келтіру уақыты шамамен 1,5-2 сағатты құрайды.

Жөндеу жұмыстары аяқталған соң қосымша ақпарат ұсыналады", - делінген "Kegoc" АҚ хабарламасында.

Мәтіннен қате тапсаңыз, бізге жазыңыз