Полицейлер Қазақстанда қандай отшашуларды рұқсатсыз атуға болмайтынын айтып берді

Полиция қарапайым азаматтарға кей отшашуларды пайдалануға рұқсат етілмегенін ескертті, деп хабарлайды KAZ.NUR.KZ Абай облысы полиция департаментіне сілтеме жасап.

Ведомство мәліметінше, Қазақстанда IV классқа жататын (қуатты) пиротехникалық бұйымдарды тек ІІМ-нің лицензиясы бар заңды тұлғалар ғана пайдалана алады.

Бұқаралық іс-шарада отшашу ұйымдастыру үшін:

• Жергілікті атқарушы органнан рұқсат алу;
• Ішкі істер органдарының келісімін алу;
• Іс-шара өтетін күнге дейін кемінде 10 жұмыс күні қалғанда өтініш беру қажет.

Сондай-ақ мына құжаттарды әзірлеп, ұсыну қажет:

• отшашудың техникалық сипаттамалары;
• отшашу атылатын орынның сызбасы;
• бұйымдарды тасымалдайтын көлік туралы ақпарат.

Отшашу ұйымдастырушыларының міндеттері:

• Көрермендер мен қызмет көрсетуші персонал үшін қауіпсіз жағдай жасау;
• Пиротехникалық бұйымдарды сақтау мен тасымалдаудың қауіпсіздігін қамтамасыз ету;
• Қауіпсіздік шараларын ішкі істер органдарымен талқылау;
• Ішкі істер органдарымен бірлесіп, отшашу өтетін орынды күзету шараларын ұйымдастыру.

Талаптар бұзылған жағдайда айыппұл салынады:

• Әкімшілік құқықбұзушылық туралы кодекстің 463-бабы — рұқсатсыз қызмет атқару;
• 483-бабы — пиротехникалық бұйымдарды сақтау, есепке алу, тасымалдау немесе қолдану ережелерін бұзу.

"Есте сақтаңыз: отшашу — жай ғана көңіл көтеру емес, қауіпті әрекет. Мереке қауіпсіз өтуі үшін заң талаптарын сақтаңыз!", - дейді полиция өкілдері.

Мәтіннен қате тапсаңыз, бізге жазыңыз