Биыл Қазақстанда 6 жаңа ақылы жол учаскесі іске қосылады

Биыл Қазақстанда 6 жаңа ақылы жол учаскесі іске қосылады. Бұл туралы үкімет отырысында "ҚазАвтоЖол" ұлттық компаниясының басқарма төрағасы Дархан Иманашев айтты, деп хабарлайды KAZ.NUR.KZ.

Үкімет отырысында Дархан Иманашев елімізде ақылы автомобиль жолдары инфрақұрылымын дамыту бойынша кезең-кезеңмен жұмыс жүргізіліп жатқанын баяндады.

Оның айтуынша, елімізде жалпы ұзындығы 4 мың 900 шақырым болатын 26 ақылы жол учаскесі жұмыс істеп тұр.

Биыл ұзындығы 2 мың шақырым болатын 6 жаңа учаскені іске қосу жоспарланып отыр. Олар:

• Қарағанды-Балқаш-Бурылбайтал – 554,6 км;
• Бурылбайтал-Құрты – 226,4 км;
• Ақтөбе-Қандыағаш-Мақат – 89 км;
• Талдықорған-Өскемен – 773 км;
• Атырау-Астрахань – 277 км;
• Мерке-Шу-Бурылбайтал – 78 км.

Сондай-ақ Дархан Иманашев ақауы бар ақылы учаскелер бойынша жол жүру ақысын алуды тоқтата тұру бойынша норма енгізілгенін атап өтті. Ақаулардың тіркелген көлемі – 1 миллион 100 мың шаршы метр. Оларды жөндеу жұмысы жол-құрылыс маусымында басталады.

Сонымен қатар жол пайдаланушылардың өтініші бойынша ақылы жолдармен жүру үшін ақы төлеу мерзімін 7 күннен 30 күнге дейін ұзарту нормасы енгізілмек, тиісті түзетулер уәкілетті органдарда келісіліп жатыр.

Мәтіннен қате тапсаңыз, бізге жазыңыз