"Аспан жарқ ете қалды да көше шамдары сөнді": әкімдік өкілдері Астанада болған жағдайды түсіндірді

Кеше, 5 наурызда қас қарайған шақта Астана аспанында жасыл түсті жарқыл байқалды. Артынша көшеде жарық сөніп қалды. Қала әкімдігі өкілдері оның себебін түсіндірді, деп хабарлайды KAZ.NUR.KZ.

Threads желісін қолданушы шамамен кешкі сағат 20:00-де бейнетіркегішке түсіп қалған видеоны жариялады. Кадрға аспанда жасыл түсті жарқыл пайда болып, көше шамдарының кенет сөніп қалған сәті ілінген.

Бейнежазбаға пікір қалдырған желі қолданушылары болған жағдайдың түрлі нұсқаларын ұсынған, бірақ көпшілігі электр желілеріндегі ақауды айтқан, тұрғындар сол кезде электр жарығы да сөніп қалғанын жазды.

"Бөкейхан мен Орынбор көшелеріндегі трансформатор күйіп кетті. Жарқыл 10 қабатты ғимараттың көлеміндей болды, қатты гүріл естілді. Мен тереземнен осындай нәрсені бірінші рет көрдім. Біздің тұрғын үй кешеніндегілер қатты таңғалды", - делінген жазбада.

"Жасыл жарықтың пайда болуына қысқа тұйықталу себеп болды, салдарынан шамдар сөніп қалды", - деп атап өтті желі қолданушысы.

"Сол жағалауда электр жарығы өшіп қалды", - деп жазды қала тұрғыны.

Астана әкімдігінің баспасөз қызметі NUR.KZ тілшісіне электр желісіндегі ақауды растады. "Астана-РЭК" АҚ мәліметінше, 5 наурызда сағат 19:54-те ауа райының қолайсыздығынан 10 кВ-тық электр желісінде техникалық ақау шықты.

"Оқиға орнына жедел топ жіберілді. Қажетті жұмыстар аяқталғаннан кейін, сағат 23:20-да электр қуаты берілді.

Сол уақытта Заречныйдағы Жиделі, Ақниет және Үшкөпір көшелеріндегі жеке тұрғын үйлер электр қуатынсыз қалды", - делінген хабарламада.

Мәтіннен қате тапсаңыз, бізге жазыңыз