Төтенше жағдайлар министрлігі Қазақстанның бірнеше өңіріндегі тұрғындарды абай болуға шақырды

Қолайсыз ауа райы жағдайлары мен қардың жиналуына байланысты еліміздің бірнеше аймағында, соның ішінде Алматыда да, өздігінен қар көшкіні жүру қаупі сақталуда, деп хабарлайды KAZ.NUR.KZ Төтенше жағдайлар министрлігіне сілтеме жасап.

Төтенше жағдайлар министрлігі баспасөз қызметінің хабарлауынша, қар көшкіні жағдайын бақылау мақсатында "Қазселденқорғау" ММ мамандары көшкін қаупі бар аумақтарға тұрақты мониторинг жүргізіп жатыр. Бүгінгі күні республика бойынша 378 жерүсті тексеру жүргізілді. Қар көшкіні жүруі мүмкін аудандарда 110 ескерту белгісі орнатылды.

"Қолайсыз ауа райы жағдайына және кейбір учаскелерде қар жамылғысының жиналуына байланысты көшкін қаупі жоғары жекелеген учаскелерде қар көшкіндерінің өздігінен түсу қаупі сақталуда.

2025–2026 жылдардағы қар көшкіні қаупі бар кезең басталғалы (2025 жылғы қараша айынан бастап) Алматы қаласында, Алматы, Жамбыл және Шығыс Қазақстан облыстарында жалпы көлемі 175600 м³ қар көшкіндерінің 66-сының өздігінен түсу фактісі тіркелді. Халықтың қауіпсіздігін қамтамасыз ету үшін жалпы көлемі 113246 м³ қар массасына тең қар көшкіні профилактикалық мақсатта 99 рет түсірілді.

Түркістан және Жамбыл облыстарының биік таулы аудандарында, сондай-ақ Алматы қаласы, Алматы, Шығыс Қазақстан және Жетісу облыстарының таулы аудандарында қар көшкіні қаупі сақталуда, қар көшкіндерінің өздігінен түсу ықтималдығы жоғары.

Көшкіндердің жүруіне түрткі болу қаупіне байланысты қар басқан беткейлерге шықпаған жөн", - делінген министрлік хабарламасында.

ТЖМ қар көшкіні қаупі туралы ескерту жарияланған кезеңде таулы аймақтарға барудан бас тартуды ұсынды.

Мәтіннен қате тапсаңыз, бізге жазыңыз