"Болашақ" тізімінен АҚШ-тың танымал университеттері алынды: ғылым және жоғары білім министрі себебін айтты

Үкіметтегі брифингте ғылым және жоғары білім министрі Саясат Нұрбек "Болашақ" бағдарламасы бойынша оқуға болатын университеттер тізімінен бірнеше АҚШ университетінің алып тасталуына қатысты пікір білдірді, деп хабарлайды KAZ.NUR.KZ.

Ғылым және жоғары білім министрінің айтуынша, соңғы жылдары АҚШ-тың бірнеше университеті, атап айтқанда, Бостон университеті, Дэйвистегі Калифорния университеті және Оңтүстік Калифорния университеті Қазақстан азаматтарын тым көп қабылдады.

"Бұлар өте мықты, жоғары рейтингке ие университеттер. Біз осы университеттерге тиісті сұраулар жібердік: "Сіздер қалайша жыл сайын ондаған, тіпті Бостон университетіне жүз шақты шақыру хаттарын жібересіздер, ал түсу қиын, бірақ сонша адам қабылданады" деп.

Онда оқуға түсуге кепілдік беретін компаниялар жұмыс істейтін болып шықты. Біз осы университеттермен келіссөздер жүргізіп, "Осы компаниялардың барлығын алып тастаңыздар, әйтпесе біз сіздерді тізімнен сызып тастаймыз" дедік. Өйткені, бізге сапа керек. Бұл университеттер ұсынысымызды қабылдамады, сондықтан біз осы шешімді қабылдауға мәжбүр болдық", - деді Саясат Нұрбек.

Мәтіннен қате тапсаңыз, бізге жазыңыз