Қазақстандық кей студенттердің стипендиясы көтерілуі мүмкін

Үкімет отырысынан кейінгі брифингте ғылым және жоғары білім министрі Саясат Нұрбек "Болашақ" стипендиясы иегерлерінің стипендиясын көтеру жоспары туралы айтты, деп хабарлайды KAZ.NUR.KZ тілшісі.

"Стипендияны көтеру мәселесі өзекті болып отыр. 2010-2011 жылдары бағдарлама жетекшісі болып жұмыс істеген кезімде біз индексацияны ескеріп, стипендия көлемін көбейткенбіз. Лондон мен Нью-Йорк сияқты ірі қалаларда шығын өте жоғары болғандықтан, біз стипендияны көтердік. Содан бері ол қайта қаралған жоқ", - деді Саясат Нұрбек.

Сонымен қатар, оның айтуынша, мәселенің өзектілігі жүргізілген талдаудан көрінген.

"Біз сол қалаларда тұтыну себеті құнының қалай өскенін және инфляция деңгейін қарастырдық. Стипендия алушылардың көпшілігіне бұл қаражат жеткіліксіз екені және олар уақытының жартысын жұмыс істеуге жұмсауға мәжбүр екені анық, бұл сайып келгенде білім сапасына әсер етеді. Және бізде стипендиялардың қайтарып алынуы және тағы басқа сұрақтар туындай бастады. Біз бұл мәселемен жұмыс істеп жатырмыз", - деді Нұрбек.

Ол қазіргі уақытта түпкілікті шешім жоқ екенін, себебі ол үшін бюджеттен қосымша қаржыландыру немесе халықаралық бағдарламалар орталығының ішкі бюджетін оңтайландыру қажет болатынын атап өтті.

"Біз стипендияны көтеру қажет екенін түсінеміз, себебі азаматтарымызға ауыр тиіп жатыр. Қаржыландыруды арттыру немесе ішкі оңтайландыру арқылы, бірақ қандай да бір жолмен шешім табылады. Біз бұл мәселені осы жылдың соңына дейін шешеміз және жаңа оқу жылына дейін шешім табуға тырысамыз", - деп сендірді министр.

Мәтіннен қате тапсаңыз, бізге жазыңыз