Алматыда ескі автокөліктерді сатып алу тетігін іске қосу мәселесі пысықталып жатыр

Алматыда ескі автокөліктерді сатып алып, кейін оларды кәдеге жарату үшін арнайы компания құрылмақ, деп хабарлайды қала әкімдігіне сілтеме жасаған KAZ.NUR.KZ.

Әкімдіктің мәліметінше, Алматыда қаладағы ауа ластануының негізгі көзі болып отырған автокөліктерден шығатын зиянды шығарындыны азайтуға бағытталған жүйелі шаралар қарастырылып жатыр.

Экология мәселелері жөніндегі ведомствоаралық кеңес отырысының қорытындысы бойынша қала әкімі Дархан Сатыбалды экологиялық класы төмен ескі автокөліктерді сатып алып, кейін оларды кәдеге жарату үшін арнайы компания құру мәселесін пысықтауды тапсырған.

"Бұл жұмыс Кәсіпкерлік және инвестициялар басқармасымен және "Алматы" әлеуметтік-кәсіпкерлік корпорациясымен бірлесіп жүзеге асырылады. Жоба аясында автопаркті жаңарту тетіктерін іске асыратын еншілес ұйым құру көзделуде.

Сонымен қатар жоба шеңберінде экологиялық таза көліктерді сатып алуға жеңілдетілген несиелеу, лизингтік бағдарламалар және Trade-In тетіктерін енгізу мүмкіндігі қарастырылуда. Жобаға Astana Motors, Orbis және басқа да жергілікті автокөлік өндірушілерін тарту жоспарланып отыр", - делінген хабарламада.

Аталған шараларды іске асыру автопаркті жаңартуды ынталандырып, тозығы жеткен көліктер санын азайтуға және соның нәтижесінде қаладағы атмосфераға таралатын зиянды шығарынды деңгейін төмендетуге мүмкіндік бермек.

Мәтіннен қате тапсаңыз, бізге жазыңыз