Шымкенттегі рейд: қалада өрт сөндіргіш пен дәрі-дәрмек қорабы күрт қымбаттаған

Шымкентте бір күнде өрт сөндіру құралы мен дәрі-дәрмек қорабы кенет қымбаттады. Бұған өзге өңір полицейлерінің рейдке келгені себеп болды, деп хабарлайды КТК.

"Менде өрт сөндіргіш құрал болмаған. Осы рейд басталған кезде базарға бардым, өрт сөндіргіш пен "аптечканы" 20 қатардан іздедім, қымбат. Дәрі-дәрмек қорабының бағасы дегенде бір жарым мың теңге еді, қазір 4 мың теңге, ал өрт сөндіргіш 4 мың теңге болса, қазір 10 мың теңге", - дейді көлік жүргізуші Дархан Әбдиев телеарна тілшісіне.

Телеарна мәліметінше, "көлікті түгел тінтеді" деп естіген жергілікті жүргізушілер жаппай базар аралап, өрт сөндіргіш пен дәрі-дәрмек қорабын сатып алған. Соның салдарынан аталған құралдар тапшы болды. Алайда бір аптаға келген полицейлер дәрі-дәрмек қорабын емес, ішімдік ішкендер мен құжатсыз жүргендерді іздеуде.

Бір түннің ішінде тәртіп сақшылары үш мас жүргізушіні анықтап, жүргізуші куәлігі жоқ 20-ға тарта адамды ұстаған. Жалпы 72 көлік айыптұрағына жеткізілген.

Дереккөз: КТК арнасы

Мәтіннен қате тапсаңыз, бізге жазыңыз