Қазақстандықтар енді еліміздің екі қаласынан Арменияға тікелей ұшып бара алады

Қазақстан Армениямен әуе қатынасын қайта жандандырды. Енді қазақстандықтар Ереванға Астана мен Ақтаудан тікелей ұшып бара алады, деп хабарлайды Көлік министрлігіне сілтеме жасаған KAZ.NUR.KZ.

Ведомствоның мәліметінше, 18 сәуірден бастап қазақстандық SCAT әуекомпаниясы Boeing 737 типті әуе кемелерімен аптасына 2 рет (сейсенбі және сенбі күндері) Ақтау – Ереван бағыты бойынша тұрақты рейстерді орындауды бастаған.

Сондай-ақ 20 сәуірден бастап армениялық SHIRAK AVIA әуекомпаниясы Астана – Ереван бағыты бойынша аптасына 1 рет (дүйсенбі күндері) тұрақты рейстерді іске қосқан. Рейстер Boeing 737 типті әуе кемелерімен орындалады.

Жаңа әуе рейстерінің ашылуы Қазақстан мен Армения арасындағы сауда-экономикалық, іскерлік және туристік ынтымақтастықты одан әрі дамытуға ықпал етеді деп күтіліп отыр.

Мәтіннен қате тапсаңыз, бізге жазыңыз