Қазақстанда электрмобильдердің мемлекеттік нөмірі түсімен ерекшеленбек

Мәжіліс отырысында ішкі істер министрінің орынбасары Қазақстанда электрмобильдерді ерекшелейтін нөмірлер енгізуді қолдайтынын мәлімдеді, деп хабарлайды KAZ.NUR.KZ тілшісі.

"Жақында мәжіліс электрмобильдер туралы заң қабылдады. Заң күшіне енді, бірақ кейбір әкімшілік мәселелер күрделене түсті, себебі техникалық жазба құрылғылары электрмобильдерді кәдімгі автомобильдерден ажырата алмай жатыр — бұл ақылы тұраққа, зарядтау станцияларына, ерекше қорғалатын табиғи аумақтарға кіруге және электрмобильді жедел анықтау қажет басқа да аумақтарға қатысты", - деді депутат Арман Қалықов.

Оның айтуынша, мәжіліс комитеті электрмобильдердің мемлекеттік тіркеу нөмірлеріне басқа түс қолдануды ұсынды.

"Бұл өзекті сұрақ. Ішкі істер министрлігі мұны қолдайды. Электрмобильдердің нөмірлік белгілерінің түсін өзгерту әлемдік деңгейде қабылданған тәжірибе; олар жасыл түске боялған, сондықтан біз бұл мәселе бойынша жұмыс істеп жатырмыз және оны қолдаймыз. Заң қабылданғаннан кейін біз заңнамалық актілер мен ережелерді де әзірлейміз, тиісті ережелерді бекітеміз және олар бүкіл ел бойынша енгізіледі", - деді Ішкі істер министрінің орынбасары Санжар Әділов.

Мәтіннен қате тапсаңыз, бізге жазыңыз