Іле-Алатау паркіндегі тастарды бүлдіргендер ондағы жазуды өз қолымен кетірді

Іле-Алатау мемлекеттік ұлттық саябағында тастарды бүлдіргендер ондағы жазуларды өз қолымен тазалады, деп хабарлайды KAZ.NUR.KZ ұлттық саябаққа сілтеме жасап.

Іле-Алатау табиғи саябағының Instagram аккаунтында Бутаковский сарқырамасы маңындағы тастарға әлдебіреулер жазу жазып кеткені туралы хабарланды. Ұлттық саябақ қызметкерлері қоршаған ортаны қорғау ережелерін бұзған адамдарды анықтады. Олар білім беру орталықтарының бірінің оқушылары болып шықты.

"Оқушыларға түсініктеме жүргізілді, олар мұндай әрекетке баруға болмайтынын түсініп, аумақты тазалау үшін бірлесіп жұмыс істеді, тастардағы жазуларды толығымен өшірді. Олар сондай-ақ табиғи орынға келтірілген залал үшін кешірім сұрады", - делінген жазбада.

Іле-Алатау саябағы өкілдері келушілерге табиғи аумақтардың ортақ мұра екенін еске салып, азаматтардан саябақта болу ережелерін сақтауды, аумақты таза ұстап, айналадағы табиғатты құрметтеуді сұрады.

Мәтіннен қате тапсаңыз, бізге жазыңыз