Риддерде экстремалды мотоспорт фестивалі басталды

Бүгін Риддер қаласында спортшыларды, мотоспорт әуесқойларын және Қазақстанның әр өңірі мен шетелден келген қонақтарды біріктірген алғашқы халықаралық Ridder Extreme Enduro экстремалды мотоспорт фестивалінің салтанатты ашылуы өтті, деп хабарлайды қала әкімдігі.

Фестивальдің жарқын бастамасы Республика алаңында өткен райдерлердің әсерлі көрсетілімдерімен ерекшеленді. Кәсіби шеберліктерін паш еткен спортшылар көрермендерге ерекше әсер, адреналинге толы көңіл күй сыйлады.

Алдағы үш күнде қатысушыларды Алтайдың таулы аймақтарындағы күрделі жарыс жолдары, тартысты бәсеке, әсерлі спорттық сәттер және мазмұнды фестиваль бағдарламасы күтуде.

Ridder Extreme Enduro – бұл тек ауқымды спорт мерекесі ғана емес, сонымен қатар туризмді дамытуға, салауатты өмір салтын насихаттауға және Риддер қаласының экстремалды туризм мен халықаралық деңгейдегі ірі іс-шаралар өтетін орталық ретіндегі беделін арттыруға бағытталған маңызды жоба.

"Барлық қатысушыға сәттілік, әділ бәсеке және жарқын жеңістер, ал қала қонақтарына Риддерден ұмытылмас әсер тілейміз!" - делінген хабарламада.

Мәтіннен қате тапсаңыз, бізге жазыңыз