Елдегі жаңа генерация: Абай облысында "Курчатов" КЭС құрылысы капсуласының іргетасы қаланды

Абай облысы Курчатов қаласында қуаттылығы 700 МВт болатын жаңа конденсациялық электр станциясы (КЭС) алаңында ресми түрде құрылыс жұмыстары басталды. 3 шілдеде мұнда Қазақстанның энергетика саласында соңғы жылдардағы ең ірі инвестициялық жобалардың бірі басталғанын білдіретін естелік капсуласының іргетасын қалау рәсімі өтті. Толығырақ __ материалынан оқи аласыздар.

"Курчатов" КЭС құрылысы электр энергиясына деген сұраныстың артуы және базалық генерация тапшылығын төмендету қажеттілігі аясында елдің генерациялаушы қуатын жаңарту бойынша негізгі жобалардың біріне айналуға тиіс. Жобаға құйылатын инвестицияның жалпы көлемі 800 млрд теңгеден асады деп бағаланып отыр.

Жаңа электр станциясы әрқайсысының қуаттылығы 350 МВт болатын екі энергоблоктан тұрады. Жобаға сәйкес, бірінші блок 2031 жылы, екіншісі 2032 жылы пайдалануға беріледі деп жоспарланған. Жобаны Энергетика министрлігімен, Абай облысы әкімдігімен және салалық компаниялармен өзара әрекеттесе отырып, "Курчатов ГРЭС-і" ЖШС іске асырады.

Құрылысты іске қосу рәсіміне энергетика вице-министрі Сұңғат Есімханов, Абай облысының әкімі Берік Уәли, энергетикалық және өнеркәсіптік компаниялардың, сонымен бірге салалық бірлестіктердің өкілдері қатысты.

Құрылыс кезеңінде мыңдаған жұмыс орны ашылады, аталған станция іске қосылғаннан кейін облыстың 400 тұрғыны тұрақты жұмыспен қамтылады.

Жоба қомақты инвестиция тартуға мүмкіндік ашады, жергілікті бизнеске қосымша жүктеме береді, инфрақұрылымның дамуына ықпал етеді және барлық деңгейдегі бюджеттерге салық түсімін қамтамасыз етеді.

"Курчатов ГРЭС-і" ЖШС жобасы акционерлерінің өкілі Темірлан Өтегенов станция құрылысы ұзақ мерзімді перспективаға арналғанын және Қазақстан өнеркәсібі мен энергетикасын дамыту үшін қосымша мүмкіндіктер қамтамасыз етуге тиіс екенін мәлімдеді.

“Бүгін біз іс жүзінде ел экономикасы үшін ондаған жыл бойы жұмыс істейтін жобаны бастап жатырмыз. Біз үшін тек жаңа генерациялаушы қуатты салу ғана емес, сонымен қатар өнеркәсіп пен өңірлердің электр энергиясына деген артып келе жатқан қажеттіліктерін қамтамасыз ете алатын заманауи, технологиялық және сенімді энергетикалық инфрақұрылым нысанын салу маңызды", – деп атап өтті Өтегенов.

Қазақстанның энергетикалық жүйесі үшін жаңа станцияның іске қосылуы стратегиялық маңызға ие екені атап өтілді. Қазақстанда электр энергиясын тұтыну көлемі артып келеді. Бұл өнеркәсіптің дамуына, жаңа өндірістердің ашылуына, цифрлық инфрақұрылымның кеңеюіне және экономиканың жалпы өсуіне байланысты. Мұндай жағдайда елге энергетикалық жүйенің тұрақты әрі сенімді жұмысын қамтамасыз ететін базалық генерацияның жаңа қуаттары қажет. "Курчатов" КЭС” жаңа

буындағы көмір электр станциясы болмақ. Жоба дәстүрлі көмір энергоблоктарымен салыстырғанда электр энергиясын өндіру тиімділігін арттыруға және қалдықтардың үлестік көрсеткіштерін азайтуға мүмкіндік беретін будың аса критикалық параметрлері технологияларын қолдануды көздейді. Жобалау кезінде Қазақстанның экологиялық заңнамасы талаптарына және ең үздік қолжетімді технологиялар қағидаттарына сәйкестігі де ескерілген.

Шара аясында қатысушылар болашақ ұрпаққа арналған жолдауға қол қойып, оны арнайы естелік капсуласына салды. Сондай-ақ электр станциясының айналасындағы жасыл белдеуге алғашқы ағаштар отырғызылды.

"Курчатов" КЭС құрылысы соңғы жылдары Қазақстанның энергетика секторында жүзеге асырылатын ең ірі жобалардың біріне айналды. Оны іске асыру елдегі базалық генерация көлемін айтарлықтай арттырып, Абай облысының да, тұтас ұлттық экономиканың да одан әрі өнеркәсіптік дамуының негізгі факторларының біріне айналуға тиіс.

Мәтіннен қате тапсаңыз, бізге жазыңыз