Қазақстан азаматтығын алғысы келетін жандар үшін маңызды ақпарат жарияланды

Ұлттық тестілеу орталығы ҚР азаматтығын алу үшін тестілеуге өтініш қабылдау қашан басталатынын мәлім етті, сондай-ақ емтихан өтетін күнді жариялады, деп хабарлайды KAZ.NUR.KZ.

Орталықтың мәліметінше, Қазақстан Республикасының азаматтығын алуға үміткерлер үшін тестілеуге өтініштерді қабылдау 10-20 тамыз аралығында өтеді.

Өтініш беру Ұлттық тестілеу орталығының app.testcenter.kz сайтында немесе UTO қосымшасы арқылы жүргізіледі.

Тестілеудің өзі 22 тамызда өтеді. Тестілеу үш бөлімнен тұрады:

• қазақ тілі бойынша тест (қазақ тілінде) – 30 тапсырма, шекті балл – 15;
• Қазақстан Республикасы Конституциясының негіздері бойынша тест (қазақ немесе орыс тілінде) – 40 тапсырма, шекті балл – 20;
• Қазақстан тарихы бойынша тест (қазақ немесе орыс тілінде) – 30 тапсырма, шекті балл – 15.

"Ең жоғары балл – 100, шекті балл – 50. Тестілеу уақыты – 2 сағат 10 минут. Мүмкіндігі шектеулі (мүгедектігі бар) тұлғаларға тестілеу тапсыру үшін қосымша 30 минут беріледі", - делінген хабарламада.

Мәтіннен қате тапсаңыз,бізге жазыңыз