Алматыда ескі полиция автокөліктері аукционға шығарылды (фото)

Алматыда ондаған ескі полиция көлігі саудаға шығарылды. Аукцион бағаны төмендету қағидаты бойынша өтеді, деп хабарлайды KAZ.NUR.KZ.

Лоттар электронды сауда алаңының порталында жарияланды. Сатылымға түрлі маркалы 50-ден астам автокөлік қойылды. Көліктердің бағасы 1 991 550 теңгеден басталады. Мысалы халыққа "Нива" деп танылған Lada-21214 көлігі осы бағада сатылуда. Көлік кузовындағы жазуға қарағанда, ол бұрын учаскелік полиция қызметіне тиесілі болған.

Көліктердің бағасы әртүрлі: Peugeot 301-дің бастапқы құны 2 126 940 теңге, 2 226 423 теңге және 2 773 584 теңге деп белгіленген. Ал Ssang Yong Actyon Sports 5 469 750 теңге, Kia Cerato 8 167 785 теңге тұрады.

Сонымен қатар 19 293 726 теңгеге 2017 жылы шығарылған КАМАЗ маркалы полиция эвакуаторын да сатып алуға болады.

Портал деректеріне сәйкес, көліктер Алматы қалалық полиция департаментіне тиесілі, ал сатушы ретінде Алматы қаласының Мемлекеттік активтер басқармасы көрсетілген.

Көліктердің көбінің бамперлері немесе басқа да бөлшектері жоқ. Сонымен қатар соққы іздері анық көрінетін зақымданған көліктер де бар.

Мәтіннен қате тапсаңыз,бізге жазыңыз