"77 жастағы қария жоғалды": Сабыр Медеевті жақындары екі айдан бері іздеп жатыр

Алматы облысында 77 жастағы қария із-түзсіз жоғалды. Сабыр Медеевті жақындары екі айдан бері іздеп жатыр, деп хабарлайды "КТК" арнасы.

"14 маусымда баласы Талдықорғаннан алып келген. Өйткені бұл кісінің әйелі ауруханаға түсіп қалады да, "балама барамын, Айдынға" деген. Ешкімде шаруасы жоқ, ешкімге зияны жоқ, тек есте сақтау қабілеті төмен болғандықтан, қай жаққа баратынын, қайдан келгенін білмей жүр. Сіздерден өтініп сұрайтыным, осы кісіге көмектессеңіздер екен, осы хабарды көрген адамдар осы кісіні тауып берсе екен дейміз. Аман-есен отбасына оралса екен дейміз", - дейді жоғалған қарияның қарындасы Шынарай Медеева.

77 жастағы қария 15 маусымда Мұхамеджан Түймебаев ауылындағы баласының үйінен белгісіз бағытта шығып кеткен. Түскі уақытта жұмыстан оралған ұлы есіктің ашық тұрғанын, ал әкесінің үйде жоқ екенін көріп, жан-жақтан іздеуге кіріседі. Жақын маңдағы үйлердің бақылау камералары тексерілген. Алайда қария олардың ешқайсысына түспепті.

Кейін бір адам оны Сайран автовокзалынан көргенін айтқан. Бұл — ақсақалдың әзірге соңғы рет көзге түскен жері. Туыстарының айтуынша, оның есте сақтау қабілеті төмен. Сондықтан бағытынан жаңылып, қайда жүргенін білмеуі мүмкін. Олар қарияны маусымнан бері жан-жақтан іздеуде. Қазір бұл жұмысқа полицейлер мен еріктілер де кірісті.

"Іздеудегі азаматтың белгілері көрсетілген бағдарламалар полицияның барлық аумақтық бөлімшесіне, сондай-ақ көршілес облыстардың полиция департаменттеріне жолданды. Іздестіру жалғасуда. Полиция қызметкерлері ер адамның орналасқан жерін анықтау үшін барлық қажет шараны қабылдады", - дейді Алматы облысы ПД ресми өкілі Ернар Сайділдин.

Дереккөз: "КТК" арнасы

Мәтіннен қате тапсаңыз,бізге жазыңыз