Қостанай әкімі жергілікті кәсіпкерді сотқа берді

Қостанай облысының экономикалық соты облыс орталығы әкімінің Қостанай – Рудный бағытындағы тасымалдаушы кәсіпкерге қатысты талап арызын қарады, деп хабарлайды KAZ.NUR.KZ облыстық сотқа сілтеме жасап.

Қостанай облыстық сотының баспасөз қызметінің мәліметінше, мамандандырылған ауданаралық экономикалық сот Қостанай қаласы әкімінің жеке кәсіпкер "Б."-ға жолаушылар мен жүкті тұрақты автомобильмен тасымалдауды ұйымдастыру туралы шартты бұзу жөніндегі талап арызы бойынша азаматтық істі қарады.

Сот талқылауы барысында тараптар дауды медиация тәртібімен реттеді.

елісімнің талаптарына сәйкес, ЖК "Б." "Қостанай – Рудный" арасында қатынайтын №120 тұрақты қала маңы бағытына қызмет көрсетуді 2026 жылғы 31 желтоқсанды қоса алғанда жалғастырады.

2027 жылғы 1 қаңтардан бастап шарттың қолданысы тараптардың өзара келісімі бойынша тоқтатылады.

Сонымен қатар жауапкер шарттың тоқтатылуына сот тәртібімен дау айтпауға және оның қолданылу мерзімі аяқталғаннан кейін талапкерге мүліктік және қаржылық талаптар қоймауға міндеттенді. Талапкер шартты бұзу туралы талабынан бас тартты.

Сот келісімді бекітіп, іс бойынша іс жүргізу тоқтатылды.

№120 "Қостанай – Рудный" бағыты 2026 жылдың соңына дейін жұмысын жалғастырады.

Сот ұйғарымы заңды күшіне енген жоқ.

Мәтіннен қате тапсаңыз,бізге жазыңыз