Астанада 140 жылдық тарихы бар халықаралық мектеп ашылды

Астанада 140 жылдық тарихы бар жаңа халықаралық мектеп ашылды. 9 гектар аумақта орналасқан мектеп 3 400 оқушыға есептелген. Бұл туралы қалалық білім басқармасы хабарлады.

Жоба президент Қасым-Жомарт Тоқаевтың Біріккен Араб Әмірліктеріне ресми сапарының қорытындысы аясында жүзеге асырылған.

Бұл – Қазақстандағы SABIS жүйесімен жұмыс істейтін алғашқы мектеп. Мұнда негізгі оқу тілі – ағылшын тілі, ал қазақ және орыс тілдері де оқытылады.

Мектептің құрылысына осы уақытқа дейін 30 млн доллар инвестиция салынған. Жалпы инвестиция көлемі 45 млн долларға дейін жетеді. Жоба аясында шамамен 100 жаңа жұмыс орны құрылды.

"Біздің мақсатымыз – Астанадағы отбасыларға Қазақстаннан шықпай-ақ сапалы халықаралық білім алуға мүмкіндік беру, SABIS-тің 140 жылға жуық тәжірибесін Қазақстанның ұлттық білім беру талаптары мен мәдени құндылықтарымен ұштастыру", - деді мектеп директоры Виктор Саад.

Айта кету керек, аталған білім беру желісі 1886 жылы құрылған. Қазір оның мектептері әлемнің 21 елінде жұмыс істейді. Астанадағы мектеп – Қазақстандағы алғашқы SABIS мектебі. SABIS International School – Astana кампусында оқу ғимараттарынан бөлек театр, жартылай олимпиадалық бассейн және спорт нысандары бар. Мектеп аумағында балабақшаға арналған жеке ғимарат та орналасқан.

Мәтіннен қате тапсаңыз,бізге жазыңыз