Жетісу облысында "Taza Post – Алакөл" экологиялық акциясы өтті

"Таза Қазақстан" жалпыұлттық идеологиясы аясында Алакөл ауданы Ақши ауылында "Taza Post – Алакөл" экологиялық акциясы ұйымдастырылды. Іс-шараның басты мақсаты – Алакөл көлінің табиғи тазалығын сақтау, қоршаған ортаға жауапкершілікпен қарау мәдениетін қалыптастыру және демалушыларды табиғатты қорғауға бағытталған нақты іске тарту. Экологиялық бастама арқылы көл жағалауындағы тазалықты қамтамасыз ету, табиғи аумақты тұрмыстық қалдықтардан тазарту және тұрғындар мен демалушылардың экологиялық мәдениетін арттыру көзделді.

Акция барысында арнайы нүкте ұйымдастырылып, демалушыларға экологиялық бокс түріндегі қажетті құралдар ұсынылды. Бокстардың құрамына қоқыс жинауға арналған қолғаптар мен қаптар енгізіліп, балалар үшін шағын сыйлықтар да қарастырылды.

Қатысушылар берілген құралдарды пайдалана отырып, Алакөл көлінің жағалауы мен оған іргелес аумақтардағы шашылған тұрмыстық қалдықтарды жинап, тазалық жұмыстарына атсалысты. Демалушылардың белсенді қатысуы қоршаған ортаны таза ұстау мәселесіне деген жауапкершіліктің жоғары екенін көрсетті.

"Іс-шара барысында қатысушыларға қоршаған ортаны ластамау, қоқысты арнайы орындарға тастау және демалыс орындарын бастапқы тазалық күйінде сақтау жөнінде түсіндіру жұмыстары жүргізілді. Бұл ретте акция тек бір күндік тазалық жұмыстарымен шектелмей, экологиялық жауапкершілікті күнделікті әдетке айналдыруға бағытталды", - деп атап өтті Жетісу облысы бойынша "Қазақстан студенттерінің альянсы" омбудсмені Қызайбай Ақерке Досымханқызы.

"Taza Post – Алакөл" акциясы аясында жүргізілген жұмыстар нәтижесінде көл жағалауының бірқатар аумақтары қоқыстан тазартылып, демалыс орнының санитарлық және эстетикалық жағдайын жақсартуға үлес қосылды.

Мәтіннен қате тапсаңыз,бізге жазыңыз