Алаяқтар ЖИ арқылы туыстарының дауысын айнытпай салады: оған кім жиі алданады

Астана қаласы прокуратурасының басқарма прокуроры Талант Қалиев Өңірлік коммуникациялар қызметінде өткен брифингте қазақстандықтар алаяқтардың арбауына қалай түсетінін айтты, деп хабарлайды KAZ.NUR.KZ тілшісі.

Талант Қалиев алаяқтардың әлеуметтік инженерияны белсенді қолданып жатқанын атап өтті.

"Қаскөйлер жасанды интеллектіні пайдаланып, туысыңыздың дауысын салып, қиын жағдайға тап болғанын хабарлайды. Мысалы адам жол-көлік оқиғасына түсті немесе басқа да келеңсіз жағдайға тап болды деп айтуы мүмкін. Ол шұғыл түрде ақша керек деп сұрайды.

Мұндай тұзаққа көбінесе егде жастағы адамдар түседі. Олар өздеріне балалары немесе немерелері хабарласып тұр деп ойлайды. Таныс дауысты естіген соң, бірден көрсетілген нөмірге ақша аударады", - дейді спикер.

Прокурор қазақстандықтардан мұндай жағдайда қоңырауды бірден үзіп, жақындарына қайта хабарласуды сұрайды. Олардың жағдайын тексеріп алу қажет.

"Ақшаны бірден аударудың қажеті жоқ. Мұндай жағдайда тек дауысқа сенуге болмайды. Туысыңызға өзіңізге белгілі нөмір бойынша қайта хабарласып, оған шынымен көмек керек пе, жоқ па, соны анықтап алу қажет", - деп кеңес берді ол.

Мәтіннен қате тапсаңыз,бізге жазыңыз