Қазақстан әуежайларының отырғызу талондарына жаңа маңызды ақпарат енгізілді

Қазақстан әуежайларындағы отырғызу талондарында қылмыстық жауапкершілік туралы маңызды ескерту жазыла бастады. Бұл туралы Бас көлік прокуратурасына сілтеме жасаған NUR.KZ хабарлайды.

Бас көлік прокуратурасының сайтында хабарланғандай, халықаралық әуежайлардың отырғызу талондарының артқы бетінде алдын алу материалдары орналастырылды. Онда жолаушыларға терроризм актісі туралы жалған хабарлама бергендер қылмыстық жауапкершілікке тартылатыны, сондай-ақ белгілі бір заттарды тасымалдауға тыйым салынғаны ескертіледі.

Енді жолаушылар отырғызу талонын алған кезде бомба туралы ойланбай айтылған "әзілдің" өзі қылмыстық жауаптылыққа әкеп соғуы мүмкін екендігі жөнінде қосымша ақпарат алады. Сонымен қатар жадынамада тасымалдауға тыйым салынған заттар, соның ішінде кастеттер, атыс қаруы, оқ-дәрілер және басқа да қауіпті бұйымдар туралы мәлімет берілген.

Жаңа профилактикалық бастамаға әлеуметтік желі қолданушылары назар аударып үлгерді. Отырғызу талондарындағы ескертулер туралы блогер Айдархан Мейірхан айтып берді.

Қазіргі уақытта бұл тәжірибе Астана, Алматы, Түркістан мен Қарағанды халықаралық әуежайларында енгізілді. Жақын арада мұндай алдын алу материалдарын елдің басқа әуежайларында да орналастыру жоспарланып отыр.

Бұл бастама көлік және авиациялық қауіпсіздік деңгейін арттыру, құқық бұзушылықтардың алдын алу және жолаушылардың жауапты мінез-құлық мәдениетін қалыптастыру мақсатында жүзеге асырылуда.

Мәтіннен қате тапсаңыз,бізге жазыңыз