Ақтөбе облысында тасқын кезінде су шайып кеткен көпір қайта қалпына келтірілді

Ақтөбе облысында Ойыл өзені арқылы өтетін жаңа көпір пайдалануға берілді. Ол 2024 жылғы су тасқыны кезінде бүлінген болатын, деп хабарлайды өңір әкімдігіне сілтеме жасаған KAZ.NUR.KZ.

Ведомствоның ресми Telegram-дағы арнасында хабарланғандай, Ойыл ауданында Ойыл ауылына апаратын автомобиль жолындағы көпірді қайта жаңарту жұмыстары толық аяқталған.

Жаңа көпірдің салтанатты ашылуы 22 тамызда өткен. Іс-шараға облыс әкімінің орынбасары Асылбек Есенбаев, аудан басшылығы, мердігер ұйым өкілдері, ауданның құрметті азаматтары мен ауыл тұрғындары қатысқан.

"Көптен күткен, ойдағы елді облыс орталығымен жалғастыратын жаңа көпірді ел игілігіне тапсырғалы тұрмыз. Нысан құрылысының күрделі және маңызды болуына сәйкес жобалау жұмыстарынан бастап бүгінгі сәтке дейін қатаң техникалық қадағалауда болды", - деді Асылбек Есенбаев.

Облыс әкімінің орынбасары көпір құрылысының екі кезеңге бөлініп жүргізілгенін, оның ішінде ауқымды әрі ұзақ мерзімді жерасты жұмыстары атқарылғанын атап өтті. Оның айтуынша, жаңа көпір өңірдегі ірі көпірлердің біріне айналып, жолаушылардың қауіпсіз қозғалысын қамтамасыз етеді.

Әкімдік атап өткендей, 2024 жылғы су тасқыны кезінде Ойыл ауылына апаратын автомобиль жолындағы көпірді су шайып, нысанға қатты зақым келген болатын.

Сол жылы қолданыстағы көпірді бөлшектеу жұмыстары жүргізілген. 2025 жылдың қаңтар айында нысанның жобалық-сметалық құжаттамасын әзірлеу аяқталып, сараптаманың оң қорытындысы алынған. Нысанның жалпы құны – 3,2 млрд теңге. Қайта жаңартылған көпірдің ұзындығы – 280 метр.

Мәтіннен қате тапсаңыз,бізге жазыңыз