Ақмола облысында жаңартылған екі вокзал пайдалануға берілді

Бүгін Ақмола облысында бірден екі жаңартылған теміржол нысаны пайдалануға берілді. Есіл қаласында жаңа вокзал жұмысын бастаса, Бұланды ауданының Никольское ауылында Ельтай станциясының вокзалы күрделі жөндеуден кейін қайта ашылды. Екі нысан да теміржол вокзалдарын жаңғырту бағдарламасы аясында жаңартылды, деп хабарлайды Ақмола облысының өңірлік коммуникациялар қызметі.

Есіл қаласындағы вокзал 1960 жылы салынған ескі ғимараттың орнына бой көтерді. Жаңа нысанның аумағы 485 шаршы метрді құрайды. Мұнда жолаушыларға арналған аймақтар мен инженерлік коммуникациялар жаңартылып, іргелес аумақ абаттандырылды. Мүмкіндігі шектеулі азаматтар үшін де қажетті жағдайлар жасалған.

Ашылу салтанатына қала тұрғындары, теміржол саласының өкілдері мен ардагерлері қатысты. Есіл ауданының әкімі Ғазиз Айтмұханбетов жаңа вокзалдың тұрғындарға қолайлы жағдай жасап, қаланың өзге елді мекендермен көлік байланысын дамытудағы маңызын атап өтті.

Сол күні Никольское ауылындағы Ельтай станциясының вокзалы да реконструкциядан кейін қайта жұмысын бастады. Мұнда жолаушыларға арналған бөлмелер жаңартылып, қолайлы жағдайлар жасалды.

Салтанатты шараға аудан және теміржол саласының өкілдері қатысты. Құрметті қонақтардың қатарында «Құрметті теміржолшы», Есіл станциясының зейнеткері Аманбай Ештаев болды.

Айта кетейік, Ақмола облысында теміржол вокзалдарын жаңғырту жұмыстары 16 нысанды қамтиды. Бүгінде олардың 14-інде жұмыс аяқталды. Оның ішінде 9 вокзал жаңадан салынса, қалғандарында күрделі реконструкция жүргізілді. Биыл шілде айында Ерейментау, Еркеншілік, Үленті, Державинск және Жалтыр станцияларының жаңартылған вокзалдары пайдалануға берілді.

Қалған екі нысан – Атбасар және Көкшетау станцияларының вокзалдарын қыркүйек айының соңына дейін пайдалануға беру жоспарлануда. Жоба толық аяқталғаннан кейін өңірдегі барлық 16 теміржол нысанында жолаушылар заманауи әрі жайлы инфрақұрылымды пайдалана алады.

Мәтіннен қате тапсаңыз,бізге жазыңыз