390 мың теңгеге сатып алған гауһар тасты сақинасы көңілінен шықпаған тұрғын ақшасын қайтарып алды

Шымкент тұрғыны зергерлік дүкеннен құны 400 мың теңгеге жуық гауһар тасты сақина сатып алған. Алайда бұйым көңілінен шықпай, нәтижесінде оған ақшасы толық қайтарылған, деп хабарлайды KAZ.NUR.KZ.

ҚР Сауда және интеграция министрлігіне қарасты Тұтынушылардың құқықтарын қорғау комитетінің ресми сайтында хабарланғандай, Шымкент қаласының тұрғыны зергерлік дүкеннен құны 390 мың теңге тұратын гауһар тасты сақина сатып алған.

Алайда сатып алған тауары көңілінен шықпағандықтан, ол тұтынушылық құқықтарын қорғау мақсатында Шымкент қаласы бойынша Сауда және тұтынушылардың құқықтарын қорғау департаментіне жүгінген.

Өтінішті қарау барысында департамент мамандары тұтынушы ұсынған құжаттарды зерделеп, ҚР заңнамасына сәйкес оның құқықтарын қорғау тәртібін түсіндірген.

Департамент мамандарының жәрдемдесуімен сатушының атына заңнамада белгіленген тәртіппен наразылық жолданған. Сондай-ақ сатушыға тұтынушылардың құқықтарын қорғау саласындағы заңнама талаптарын сақтау қажеттігі түсіндірілген.

Жүргізілген жұмыстың нәтижесінде тұтынушының талаптары қанағаттандырылған. Сатушы 390 000 теңге көлеміндегі қаражатты толық қайтарған.

Мәтіннен қате тапсаңыз,бізге жазыңыз