Алматыда саябақ салу үшін 20-дан астам жер телімі мемлекет меншігіне алынады

Алматыда Назарбаев пен әл-Фараби даңғылдарының қиылысы тұсында саябақ салу үшін 20-дан астам жер телімі мемлекет қажеттілігі үшін алынады. Сондай-ақ қаланың басқа аудандарында да бірнеше жер телімі жеке иеліктен шығарылады, деп хабарлайды KAZ.NUR.KZ.

Қала әкімінің тиісті қаулылары "Вечерний Алматы" газетінде жарияланды.

Атап айтқанда, әкімдік мемлекет мұқтаждығы үшін Алматының Медеу ауданындағы 21 жер телімін мәжбүрлеп иеліктен шығаруды бастау туралы қаулы етті. Сөз әл-Фараби даңғылынан оңтүстікке қарай және Назарбаев даңғылынан батысқа қарай орналасатын жалпы пайдаланудағы нысан – саябақ туралы болып отыр.

Мәжбүрлеп иеліктен шығару күні 2028 жылғы 31 желтоқсан деп белгіленді. Меншік иелеріне заңнамада белгіленген тәртіппен өтемақы төленетіні, ал жер телімдері тәркіленгеннен кейін Алматы қаласы Қоғамдық кеңістікті дамыту басқармасының балансына берілетіні хабарланды. Сүру жұмыстары Кірпіш зауыты, Панфилов және Назарбаев көшелерінде орналасқан жер телімдерінің иелеріне қатысты болады.

Сонымен қатар қаланың басқа аудандарында да бірнеше жер телімі тәркіленеді: Құлжа тасжолы 94 мекенжайындағы жер телімі су айдау станциясын салу үшін алынады; оның жанындағы Құлжа тасжолы, 94/2 мекенжайындағы жер телімі Рысқұлов даңғылынан Бұқтырма көшесіне дейінгі Құлжа тасжолын жаңарту үшін тәркіленеді. Тастақ-2 шағын ауданы, 5/1 мекенжайындағы жер телімі жалпы пайдаланудағы нысан үшін алынады.

Иеліктен шығару бойынша барлық жұмыс 2027 жылғы 31 желтоқсанға дейін аяқталады деп күтілуде.

Бұдан бөлек Көкшоқы шағын ауданы, 1/10 мекенжайында орналасқан жалпы ауданы 0,9724 га жер телімінің 0,1665 га бөлігіне "Көкжайлау" тау шаңғысы кешеніне апаратын жолды салу үшін 2029 жылдың соңына дейінгі құрылыс кезеңіне шектеулі пайдалану құқығы белгіленеді.

Мәтіннен қате тапсаңыз,бізге жазыңыз