Түркістан облысында қашан жылу беріледі

Биыл Түркістан облысында жылу беру маусымы 15 қазан мен 1 қараша аралығында басталмақ. Қазір өңірде дайындық жұмыстары жүргізіліп жатыр, деп хабарлайды Kazinform агенттігіне сілтеме жасаған KAZ.NUR.KZ.

Облыстық энергетика және тұрғын үй-коммуналдық шаруашылық басқармасының бөлім басшысы Марат Байгунусовтың айтуынша, жылу маусымының басталуы сыртқы ауа температурасына байланысты.

Яғни, сыртқы ауаның орташа тәуліктік температурасы бес күн бойы +8°C-тан төмен болған жағдайда жылу беріле бастайды.

"Облыста жылыту маусымы 15 қазан мен 1 қараша аралығында басталады деп жоспарланып отыр. Өңірдегі дайындық жұмыстары облыстық штабтың тұрақты бақылауында", - деді ол.

Оның мәліметінше, 2026-2027 жылдардағы жылыту маусымына өңірдегі 1265 білім беру, 737 денсаулық сақтау, 239 мәдениет, 74 спорт, 9 жұмыспен қамту нысаны және 737 көпқабатты тұрғын үй дайындалған.

Айта кетейік, бұған дейін Алматыда жылыту маусымы қашан басталатыны белгілі болған еді.

Мәтіннен қате тапсаңыз, бізге жазыңыз