Мысыр қазақстандық туристер үшін елге кіру тәртібін жеңілдетеді

Мысыр бұған дейін Орталық Азия елдері үшін енгізілген қосымша визалық талаптарды қазақстандық туристер үшін жояды, деп хабарлайды ҚР СІМ-ге сілтеме жасаған KAZ.NUR.KZ.

Сыртқы саяси ведомствоның баспасөз қызметі хабарлағандай, ҚР сыртқы істер министрі Мұхтар Тілеуберді Мысырға ресми сапары аясында сыртқы істер, халықаралық ынтымақтастық және шетелдегі мысырлықтар істері министрі Бадр Абдельаттимен кеңейтілген құрамда келіссөздері өткен.

Кездесу барысында 2026 жылғы 7 қарашадағы дипломатиялық паспорттардың иелерін визалық талаптардан босату туралы үкіметаралық келісімге өзгерістер енгізу жөніндегі хаттамаға қол қойылған. Құжат Қазақстан мен Мысырдың жарамды қызметтік паспорттары бар азаматтарына визасыз режимді қолдануды кеңейтуді көздейді.

"Келіссөздердің негізгі нәтижелерінің бірі Мысыр тарапы туристік мақсатта елге келетін азаматтарына қосымша талаптар енгізген Орталық Азия мемлекеттерінің тізімінен Қазақстанды алып тастау туралы уағдаластыққа қол жеткізілуі болды.

Бұл шешім қазақстандық туристердің Мысырға кіру шарттарын жеңілдетуге және туристік алмасуларды одан әрі дамытуға бағытталған", - делінген хабарламада.

Қазір талаптар қандай?

ҚР СІМ сайтында жазылғандай, 2025 жылғы 1 қазаннан бастап Қазақстан Республикасының азаматтарына қатысты Мысырдың визалық режимінің жаңа талаптары күшіне енген.

Жаңа тәртіпке сәйкес: 21 жасқа толмаған қазақстандықтар ата-анасының біреуінің (әкесі немесе анасы) бірге жүруінсіз Мысыр аумағына кіре алмайды;

21 жасқа толған азаматтар Мысырға туристік сапармен барғанда, егер сапар тек Шарм-эш-Шейх аймағымен шектеліп, 15 күннен аспайтын болса, визаны Шарм-эш-Шейх халықаралық әуежайында рәсімдей алады;

Каир, Хургада немесе Мысырдың басқа қалаларына баруды жоспарлаған азаматтар сапар алдында Қазақстандағы Мысыр елшілігінен виза алуы тиіс.

Мәтіннен қате тапсаңыз, бізге жазыңыз