"Сергек" камерасы BMW көлігін автобуспен шатастырды: полиция Алматы тұрғынына салынған айыппұлды жойды

Алматы тұрғыны "Сергек" камераларынан келген айыппұл нұсқамасына қатысты шағымданды – бейнетіркегіш оның BMW автокөлігін автобус деп қате түсінген. Полиция ақауды растап, нұсқаманың жойылғанын мәлім етті, деп хабарлайды KAZ.NUR.KZ.

Алматы тұрғыны Санжар Нарубаев Instagram желісіндегі парақшасында соңғы уақытта автобус жолағымен жүргені үшін төрт айыппұл арқалағанын, бірақ, оның айтуынша, суреттерде тіркелген бұзушылықтарды өзі жасамағанын айтты. Ер адамның айтуынша, "Сергек" камераларынан түсірілген фото мен видеода автобус көрсетілген, ал оған BMW көлігіне қатысты нұсқамалар келген.

Ол таңбалардың ұқсастығына байланысты өзінің және автобустың мемлекеттік тіркеу нөмір белгілерін камера шатастыруы мүмкін деп болжады.

"Соңғы уақытта төрт айыппұл алдым – автобус жолағымен жүргені үшін (бүгін 09:14-те соңғысы келді). Бейне және фотофиксацияда – автобус. Бірақ менде BMW. Өкінішке қарай, біздің нөмірлер өте ұқсас және "Сергек" жасанды интеллектісі нөмірді әрдайым ажырата алмайды және айыппұл маған келеді", - деп жазды Нарубаев.

Ер адамның айтуынша, қате нұсқамалардың кесірінен ол полицияға жүгінуге және айыппұлдарға шағымдануға уақыт жұмсап отыр. Сондай-ақ ол жүйенің мұндай қателерге неліктен жол беретінін анықтау үшін ресми сауал жіберетінін мәлімдеді.

Алматы қалалық полиция департаменті жағдайға қатысты түсінік берді.

"Алматы қаласының полиция департаменті BMW маркалы автокөлікке қатысты нұсқама мемлекеттік тіркеу нөмір белгісін дұрыс танымау салдарынан қате тіркелгенін хабарлайды.

Әкімшілік құқық бұзушылық құрамының болмауына байланысты нұсқама Әкімшілік құқықбұзушылық туралы кодекстің 741-бабы негізінде тоқтатылды", - делінген хабарламада.

Мәтіннен қате тапсаңыз, бізге жазыңыз