Алматы әкімдігі нөсерге байланысты тұрғындарға үндеу жасады

Алматы әкімдігі қалаға жауған нөсер салдары туралы мәлімет таратты. Қалада бір түнде 36 мм жауын-шашын түскен, деп хабарлайды KAZ.NUR.KZ әкімдіктің баспасөз қызметіне сілтеме жасап.

Қала әкімдігінің баспасөз қызметінің хабарлауынша, Алматыда 10 қарашаның кешінен бері жаңбыр жауып тұр. Бүгін таңғы сағат 10-ға қарай қалада 23 мм, Медеу ауданында – 26 мм, Каменск үстіртінде 36 мм жауын-шашын түскен.

"Қазір коммуналдық қызмет күшейтілген режимде жұмыс істеп, көше мен аулада жиналған суды сорып жатыр.

Кезекшілікте 85 жедел бригада бар. Жұмысқа 415 арнайы техника мен 97 мотопомпа жұмылдырылған. Сондай-ақ жұмысқа тәулік бойы 3 253 жол саласы жұмысшысы тартылған", - дейді әкімдіктегілер.

Синоптиктердің болжамынша, 11 қарашада күні бойы оқтын-оқтын жаңбыр жауады. Тағы 10 мм-ге дейін жауын-шашын түсуі мүмкін. Желдің екпіні секундына 15-20 метрге дейін жетеді.

Жүргізушілерге жылдамдықты азайтып, су жиналуы мүмкін жерлерге көлігін қоймағаны жөн екені ескертіледі.

Мәтіннен қате тапсаңыз, бізге жазыңыз