2023 жылы Нью-Дели мен Ташкентте өтетін бокстан әйелдер мен ерлер арасындағы әлем чемпионатынан бірнеше ел бас тартты. Осыған орай, Қазақстан бокс федерациясының президенті Кеңес Рақышев пікір білдірді, деп жазады KAZ.NUR.KZ тілшісі.
"Біріншіден, Халықаралық Олимпиада комитеті мен Халықаралық бокс қауымдастығының тарихи текетіресін барлығы біледі деп ойлаймын. Халықаралық Олимпиада комитеті осымен екінші Олимпиаданы ұйымдастыру ісіне әлемдік бокс қауымдастығын (ІВА) қатыстырмай отыр. Біз үшін бұл жаңалық емес. Бұған психологиялық және стратегиялық тұрғыдан дайын болдық.
Екіншіден, АҚШ пен басқа да кейбір еуропалық командалардың әлем чемпионатынан бас тартуы, өкінішке қарай, біз үшін жақсы емес. Ең алдымен бәсекелестікке зиян тиеді. Бұл жерде біз ештеңе істей алмаймыз. Егер қазақстандық боксшылар әлем чемпионатына қатыспайтын болса, жанкүйерлер бізді кешірмейді. Біз бұлай істей алмаймыз. Қазір халықаралық жарыстар онсыз да көп емес. Сондықтан әлем чемпионатына міндетті түрде қатысамыз", - деді Кеңес Рақышев.
Еске сала кетейік, бүгін Қазақстан бокс федерациясы жастар арасындағы әлем чемпионатының жеңімпаздары мен жүлдегерлерін марапаттады.
Сондай-ақ жиын барысында Рақышев Ташкенттегі әлем чемпионатында Олимпиада жолдамасы сарапқа салынбайтынын айтты.
Мақаланың түпнұсқасы: https://kaz.nur.kz/sport/boxing/2009536-raqysev-aqs-bastagan-memleketterdin-alem-cempionatynan-bas-tartuyna-qatysty-pikir-bildirdi/
