Қазақстандық боксшы Венгриядағы турнирде әлем чемпионынан жеңіліп, жүлдесіз қалды

Бокстан Венгрияның Дебрецен қаласында өтіп жатқан Иштван Бочкай атындағы халықаралық турнирде Қазақстан ерлер құрамасының бір өкілі жарыс жолынан шығып қалды, деп жазады Sports.kz.

Байрақты бәсекеде 80 келіге дейінгі салмақта өнер көрсеткен Нұрбек Оралбай ширек финалда Украина өкілі Александр Хижнякпен жұдырықтасып, қарсыласына есе жіберді.

Осылайша, отандық боксшы Иштван Бочкай атындағы халықаралық турнирде жүлдеге бір табан қалғанда жарыс жолынан шығып қалды.

Айта кетейік, Нұрбек Оралбайдан басым түскен Александр Хижняк атақты боксшының бірі. Ол - Токио Олимпиадасының жүлдегері және бокстан 2017 жылы Гамбург қаласында өткен Әлем чемпионатының жеңімпазы.

Мәтіннен қате тапсаңыз, бізге жазыңыз