Кәсіби боксшы Айдос Ербосынұлы ауыр жарақаттан соң үлкен спортқа қайта орала ма? Бұл сауалға ол Қазақпаратқа берген сұхбаты барысында жауап берді.
"Бұл жарақат өте ауыр болды ғой. Сондықтан кемінде бір жыл керек деп ойлаймын. Ол енді өз пайымым. Алматыда оңалтуда жатқанда Оңтүстік Кореяның дәрігерлеріне тікелей байланысқа шықтық. Сонда олар медицналық құжаттарымды қарап, талдауларымды көріп, "боксқа қайтып орала берсеңіз болады" дегендей кеңес берді. "Қатты оралғыңыз келсе, оралыңыз. Ал негізі қойғаныңыз дұрыс. Өйткені рингке шыққан соң не болатынын болжап бере алмаймыз" дегенді айтты. Олар да шешімді өзіме итеріп тұр", - деді боксшы.
Айдос Ербосынұлы дәл қазір денсаулығында мазалайтын мәселе жоқ екенін сөз етті.
"Дегенмен боксты әрі қарай жалғастырсам да, жалғастырмайтын болсам да өзім үшін толық зерттеліп, емделу артық емес деп ойлаймын", - деді ол.
Айта кетелік, Айдос Ербосынұлы 2022 жылдың қарашасында кубалық Дэвид Моррелмен кездесіп, 12 раунд қорытындысы бойынша жеңіліс тапты.
Ал жекпе-жектен соң оның жағдайы күрт нашарлап, боксшы комаға түскен болатын.
Мақаланың түпнұсқасы: https://kaz.nur.kz/sport/boxing/2029690-keminde-bir-zyl-kerek-aidos-erbosynuly-sarsy-alanga-qaita-orala-ma/
