Боксшы Батыр Жүкембаев бұрынғы әлем чемпионымен жұдырықтасады

Қазақстандық боксшы Батыр Жүкембаев (21-1, 16 КО) кәсіпқой бокстағы келесі жекпе-жегі туралы ресми түрде мәлімдеме жасады. Бұл туралы KAZ.NUR.KZ боксшының twitter-дегі ресми парақшасына сілтеме жасап хабарлайды.

Кәсіпқой рингте 21 кездесу өткізіп, бір рет жеңілген боксшы жартылай орта салмақтағы Батыр Жүкембаев 13 желтоқсанда АҚШ-тың Плант-Сити қаласында кезекті жекпе-жегін өткізеді. Ол ProBox TV бокс кешінде тәжірибелі Мохамед Мимунмен (23-5, 4 КО) жұдырықтасады.

Қазақстандық боксшы twitter-дегі ресми парақшасында "13 желтоқсан. Кеттік!", — деп жазып, келесі жекпе-жегінің хабарландыруын жариялады.

10 раундқа жоспарланған жекпе-жек 14 желтоқсанда Астана уақытымен таңғы 07:00-де өтеді.

Еске салайық, Батыр Жүкембаев қыркүйекте АҚШ-тағы Плант-Сити қаласында өткен соңғы жекпе-жегінде аргентиналық қарсыласы Уго Альберто Рольды (22-2-1, 7 КО) жеңген еді. Осылайша кәсіпқой бокстағы 21-жеңісіне қол жеткізген болатын.

Мохамед Мимун соңғы рет 26 шілдеде АҚШ-тың Киссимми қаласында өткен жекпе-жекте америкалық Стивен Галеаноны (12-1, 9 КО) нокаутқа түсіріп, жеңіске жетті. Ол 2018 жылы IBO нұсқасы бойынша бірінші орта салмақтағы әлем чемпионы титулын иеленген еді.