Жеңіліс көрмеген қазақстандық боксшы шаршы алаңға оралады

Екінші жеңіл салмақта өнер көрсететін қазақстандық кәсіпқой боксшы Сұлтан Заурбек келесі жекпе-жегінің өтетін күнін жариялады. Бұл туралы KAZ.NUR.KZ спортшының Instagram-дағы ресми парақшасына сілтеме жасап хабарлайды.

Сұлтан Заурбек рингке көктемнің басында оралады.

"Мен 1 наурызда рингке қайта шығамын", – деп жазды Сұлтан Заурбек Instagram парақшасында.

Қарсыластың есімі әлі жарияланған жоқ, бірақ боксшының оқу-жаттығу жиыны Ұлыбританияда өтіп жатыр.

Еске салайық, жеңіліс көрмеген қазақстандық боксшы соңғы жекпе-жегін өткен жылдың қараша айында Англияның Брайтон қаласында өткізген еді. Сол кездесуде Сұлтан Заурбек аргентиналық спортшы Серхио Сосадан басым түсті.