Қазақстандық бес боксшы Бакуде (Әзербайжан) өтіп жатқан "Ұлы Жібек жолы" халықаралық турнирінің финалына шықты. Бұл туралы KAZ.NUR.KZ тілшісі хабарлайды.
Бүгін, 27 наурызда қазақстандық төрт былғары қолғап шебері Бакудегі турнирдің жартылай финалында жұдырықтасты. Төртеуі де ақтық сынға жолдама алды.
48 келі салмақ дәрежесіндегі Теміртас Жүсіпов Ресей өкілі Адам Әлиевтен басым түсті. Тимур Қабдешов (54 келі) ресейлік боксшы Максим Кузнецовтен айласын асырды. Ал Талғат Сырымбетов (60 келі) өзбек жігіті Бахтиер Асадовты жеңді. Қазақстандық боксшылардан ақтық айқасқа соңғы болып 71 келіде Дархан Дүйсебай шықты. Ол жартылай финалда Иран өкілі Касра Тахмасевиді ұтты.
Еске салайық, кеше, 26 наурызда 92 келі салмақ дәрежесіндегі Cағындық Тоғамбай жартылай финалда Ресей өкілі Рамазан Ханалиевті жеңіп, финалға жолдама алған еді. Осылайша, барлығы бес қазақстандық боксшы ақтық сында бақ сынайды.
Мақаланың түпнұсқасы: https://kaz.nur.kz/sport/boxing/2074365-qazaqstandyq-bes-bokssy-bakudegi-zarystyn-altyn-medali-usin-zudyryqtasady/
