Бокстан Қазақстан жастар құрамасына аға жаттықтырушы тағайындалды

Қайрат Сәтжанов бокстан ерлер арасындағы Қазақстан жастар құрамасына аға жаттықтырушы болып тағайындалды. Бұл туралы KAZ.NUR.KZ Қазақстан бокс федерациясының Instagram-дағы парақшасына сілтеме жасап хабарлайды.

Қайрат Сәтжанов жаңа қызметінде Әділ Басығараевты алмастырды.

Қайрат Тұрсынқанұлы – Қазақстанның еңбек сіңірген жаттықтырушысы. 2011-2019 жылдар аралығында Қазақстан жасөспірімдер құрамасын жаттықтырған. 2013 жылғы Әлем чемпионатында 2 алтын, 1 күміс, 5 қола еншілесе, 2015 жылғы дүниежүзілік додада 1 алтын, 1 күміс, 3 қолаға қол жеткізген. 2019-2021 жылдары жастар құрамасының аға бапкері болды. 2021 жылғы Әлем чемпионатында 2 алтын, 2 күміс және 1 қола медаль жеңіп алды. Ал 2021-2022 жылдар аралығында ұлттық құраманың бас бапкері болып, 2021 жылғы дүниежүзілік додада 2 алтын, 2 күміс, 1 қола медальмен жалпыкомандалық есепте екінші орынды әперді.

Қазақстан жастар және жасөспірімдер құрамасының жаңа бапкерлер алқасы:

• Қазақстан жастар құрамасының аға бапкері – Қайрат Сәтжанов;
• Қазақстан жастар құрамасы аға бапкерінің көмекшісі – Бағдат Оңғарбеков;
• Қазақстан жасөспірімдер құрамасының аға бапкері – Мақсат Оспанов;
• Қазақстан жасөспірімдер құрамасы аға бапкерінің көмекшісі – Азамат Игибаев;
• Қазақстан кіші жасөспірімдер құрамасының бапкері – Жақсылық Молдаханов.

Сондай-ақ, бокстан әйелдер арасындағы Қазақстан жастар құрамасына аға жаттықтырушы болып Жангелді Ахметов тағайындалды. Ол бұл қызметте әйелдер құрамасының бас бапкерлігіне тағайындалған Елдос Сайдалинді алмастырды.

Жангелді Әлімжанұлы – Қазақстанның еңбек сіңірген жаттықтырушысы. Жаттықтырушылық тәжірибесі – 25 жыл. Бүгінге дейін Жетісу облысының әйелдер арасындағы аға жаттықтырушысы қызметін атқарды.

Қыздар арасындағы жастар және жасөспірімдер құрамасының жаңа бапкерлер алқасы:

• Қазақстан жастар құрамасының аға бапкері – Жангелді Ахметов;
• Қазақстан жастар құрамасы аға бапкерінің көмекшісі – Айдар Сайдалин;
• Қазақстан жасөспірімдер құрамасының аға бапкері – Айбек Әбілдә.

Мәтіннен қате тапсаңыз, бізге жазыңыз