Геннадий Головкинге Париж Олимпиадасында ерекше міндет жүктелді (видео)

Қазақстан Ұлттық Олимпиадалық комитетінің президенті Геннадий Головкин бокстан Олимпиада ойындарының кезекті жарыс күнін ашып берді. Бұл туралы KAZ.NUR.KZ Ұлттық Олимпиадалық комитеттің ресми сайтына сілтеме жасап хабарлайды.

2024 жылғы Париж Олимпиадасын ұйымдастырушылар Геннадий Головкинге құрмет көрсетіп, 31 шілдедегі бокс бәсекесін ашу мәртебесін ұсынды. Головкин ағаш таяқпен еденді үш рет ұрып, жекпе-жектердің басталғанын хабарлады. 

Бұл – 2024 жылғы Олимпиада ойындарына енгізілген басты жаңалықтардың бірі. Ұйымдастырушылар Францияның мәдени дәстүрлеріне басымдық бере отырып, театр мен спортты біріктіруге ұмтылған. Осы дәстүр көпшілікті спортшылардың өнеріне үлкен құрметпен қарауға шақырады. Үш соққы көрермендерді әрбір оқиғаның жанкүйер құрметіне лайық екенін еске салады және үш соққы орындалған кезде театрдағы секілді, трибунаға жиналған жанкүйерлер де бір минут үнсіздік сақтауы керек. 

Еске салайық, бүгін, 31 шілдеде шаршы алаңға шыққан қазақстандық боксшы Махмұд Сабырхан испаниялық Хосе Кильеспен жұдырықтасып, ұтылып қалған еді. Кейін ол жеңілісіне қатысты пікір білдірді.

Осыған дейін қазақстандық боксшылардың ішінен Асланбек Шымбергенов (71 кг), Қамшыбек Қоңқабаев (+92 кг) Олимпиаданы аяқтаған еді. Ал Сәкен Бибосынов (51 кг), Мұхаммедсабыр Базарбайұлы (63,5 кг), Нұрбек Оралбай (80 кг), Айбек Оралбай (92 кг) ширек финалға шықты.

Мәтіннен қате тапсаңыз, бізге жазыңыз