Бүгін, 28 қазанда АҚШ-тың Колорадо штатында World Boxing қауымдастығы ұйымдастырып жатқан жастар арасындағы (U-19) әлем чемпионатында қазақстандық боксшылар Ерасыл Аманғалиев пен Асылхан Көшербай алғашқы жекпе-жектерін сәтті өткізді. Бұл туралы KAZ.NUR.KZ Қазақстан бокс федерациясының баспасөз қызметіне сілтеме жасап хабарлайды.
Ерасыл Аманғалиев 55 кг дейінгі салмақта 1/8 финалда чехиялық боксшы Ондржей Томашпен кездесіп, екінші раундта нокаутпен жеңіске жетті. Енді Ерасыл Аманғалиев ширек финалда америкалық Эмануэль Чэнспен шеберлік байқасады.
Асылхан Көшербай да өзінің алғашқы жекпе-жегін сәтті өткізді. 65 кг дейінгі салмақта чехиялық Симон Стожкимен кездесіп, бірінші раундта қарсыласын екі рет нокдаунға жіберді. Төреші жекпе-жекті тоқтатып, жеңісті Асылхан Көшербайға берді. Келесі жекпе-жегін Асылхан Көшербай ширек финалда америкалық Месиа Нимомен өткізеді.
Сондай-ақ бұл бәсекеде ел намысын тағы екі қазақстандық боксшы қорғайды. Олар: Диас Серікұлы (70 кг) және Даниял Райымбеков (85 кг).
Айта кетейік, World Boxing ұйымдастыруымен алғаш рет өтетін 19 жасқа дейінгі боксшылар арасындағы әлем чемпионаты 26 қазан мен 2 қараша аралығында Пуэбло (Колорадо штаты, АҚШ) қаласында өтіп жатыр. Әлем чемпионатына 30 елден 180 боксшы бақ сынауда.
Мақаланың түпнұсқасы: https://kaz.nur.kz/sport/boxing/2179638-qazaq-boksshylary-world-boxing-uiymdastyrgan-alem-chempionatyn-satti-bastady-video/
