Бокстан әлем чемпионаты: қазақстандық спортшылардың финалдағы қарсыластары анықталды

Қазақстандық боксшылардың Будвада (Черногория) өтіп жатқан жастар арасындағы әлем чемпионатының финалындағы қарсыластары анықталды. Бұл туралы KAZ.NUR.KZ Қазақстан бокс федерациясының Telegram-дағы арнасына сілтеме жасап хабарлайды.

Әлем біріншілігінің финалында Қазақстан намысын 7 боксшы қорғайды. Оның төртеуі ұл, үшеуі қыз. Финалдық жекпе-жектер 2-3 қараша аралығында өтеді.

Қазақстандық боксшылардың финалдағы қарсыластары:

• 51 кг: Бексұлтан Боранбек – Джастин Морено (Колумбия);
• 67 кг: Төрехан Сабырхан – Давид Эспиноза Сантоя (Куба);
• 71 кг: Өнер Сейілхан – Алексей Гуков (Ресей);
• 75 кг: Санжарәлі Бегалиев – Джафарбек Шахбазов (Өзбекстан);
• 50 кг: Елянұр Тұрғанова – Карла Пики (ХБА бейтарап спортшысы);
• 66 кг: Ұлдана Таубай – Кайла Дойл Бирн (Ирландия);
• 81 кг: Аружан Зейноллаева – Рухшона Папиева (Өзбекстан).

Айта кетейік, Будва бәсекесінің жартылай финалында Қазақстан құрамасы сапынан 17 спортшы (8 ер, 9 әйел) сынға түсті. Оның ішінде 10 боксшы жеңіліске ұшырап, қола жүлде еншіледі.

Жарыстың жалпы жүлде қоры – 500 000 АҚШ доллары. Жеңімпаздарға 8000 доллар, күміс жүлдегерлерге 4000 доллар, қола жүлдегерлерге 2000 доллар, ширек финалистерге 1000 доллар сыйақы беріледі.

Мәтіннен қате тапсаңыз, бізге жазыңыз