Бокстан Қазақстан ерлер құрамасының мүшесі Сағындық Тоғамбай Азия чемпионатында алтын медаль жеңіп алды. Бұл туралы KAZ.NUR.KZ тілшісі хабарлайды.
Қазақ боксшысы 92 кг салмақ дәрежесіндегі финалда тәжікстандық Парвиз Каримовпен кездесті. Бұл бәсекеде Сағындық қарсыласын үш рет нокдаунға түсіріп, екінші раундта мерзімінен бұрын жеңіске жетті.
Айта кетейік, Сағындық Тоғамбай – 2022 жылғы Азия чемпионаты мен жазғы Азия ойындарының қола жүлдегері. Сонымен қатар, ол үш рет жастар арасында Азия чемпионы атанған.
Қазір Қазақстан ерлер құрамасының қоржынында Азия чемпионатының 3 алтын, 5 күміс, 1 қола жүлдесі бар. Махмұд Сабырхан (54 кг), Бекзат Нұрдәулетов (86 кг), Cағындық Тоғамбай (92 кг) чемпион атанса, Санжар Тәшкенбай (48 кг), Оразбек Асылқұлов (57 кг), Дулат Бекбауов (67 кг), Абылайхан Жүсіпов (71 кг), Диас Молжігітов (75 кг) күміс және жартылай финалда жеңілген Ерасыл Жақпеков (80 кг) қола медаль иеленді.
Мақаланың түпнұсқасы: https://kaz.nur.kz/sport/boxing/2199083-qazaq-boksshysy-cagyndyq-togambai-aziia-chempiony-atandy/
